سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم ایک غزوہ سے واپس تشریف لائے تو نبی صلی اللہ علیہ وسلم کے صحابہ کو سخت بھوک نے آ لیا اور ان کا زادِ راہ ختم ہو گیا۔ وہ رسول اللہ صلی اللہ علیہ وسلم کی خدمت میں حاضر ہوئے، آپ سے اپنی اس تکلیف کی شکایت کی اور اپنی بعض سواریوں کو ذبح کرنے کی اجازت مانگی، تو آپ صلی اللہ علیہ وسلم نے انہیں اجازت دے دی۔ وہ وہاں سے نکلے تو ان کا گزر سیدنا عمر رضی اللہ عنہ کے پاس سے ہوا، انہوں نے پوچھا: ”تم کہاں سے آ رہے ہو؟“ انہوں نے بتایا کہ انہوں نے رسول اللہ صلی اللہ علیہ وسلم سے اپنے بعض اونٹ ذبح کرنے کی اجازت طلب کی ہے۔ سیدنا عمر رضی اللہ عنہ نے پوچھا: ”کیا آپ صلی اللہ علیہ وسلم نے تمہیں اجازت دے دی ہے؟“ انہوں نے کہا: ”جی ہاں۔“ انہوں نے فرمایا: ”میں تمہیں قسم دیتا ہوں کہ تم میرے ساتھ رسول اللہ صلی اللہ علیہ وسلم کی طرف واپس چلو۔“ چنانچہ وہ ان کے ساتھ واپس آئے۔ سیدنا عمر رضی اللہ عنہ رسول اللہ صلی اللہ علیہ وسلم کی خدمت میں حاضر ہوئے اور عرض کی: ”اے اللہ کے رسول! کیا آپ نے انہیں اپنی سواریاں ذبح کرنے کی اجازت دے دی ہے؟ پھر یہ کس چیز پر سوار ہوں گے؟“ رسول اللہ صلی اللہ علیہ وسلم نے فرمایا: ”تو پھر میں کیا کروں؟ میرے پاس کچھ نہیں جو انہیں (کھانے کو) دوں۔“ سیدنا عمر رضی اللہ عنہ نے عرض کی: ”کیوں نہیں اے اللہ کے رسول! آپ حکم فرمائیں کہ جس کے پاس بھی ضرورت سے زائد توشہ ہو وہ اسے لے آئے، پھر آپ اسے کسی چیز پر جمع کر لیں، پھر اس میں برکت کی دعا فرمائیں، پھر اسے ان کے درمیان تقسیم کر دیں۔“
آپ صلی اللہ علیہ وسلم نے ایسا ہی کیا اور انہیں بچا ہوا توشہ لانے کے لیے بلایا، تو ان میں سے کوئی تھوڑی مقدار لے کر آیا اور کوئی زیادہ۔ آپ صلی اللہ علیہ وسلم نے اسے ایک جگہ جمع کیا، پھر اس میں وہ دعا فرمائی جو اللہ نے چاہی کہ آپ فرمائیں۔ پھر اسے لوگوں کے درمیان تقسیم کر دیا، تو ان میں سے کوئی ایک بھی ایسا نہ بچا جس نے اپنا برتن نہ بھر لیا ہو، بلکہ اس کے بعد بھی کھانا بچ گیا۔ اس موقع پر آپ صلی اللہ علیہ وسلم نے فرمایا: «أَشْهَدُ أَنْ لَا إِلَهَ إِلَّا اللهُ وَحْدَهُ لَا شَرِيكَ لَهُ، وَأَشْهَدُ أَنَّ مُحَمَّدًا عَبْدُهُ وَرَسُولُهُ» ”میں گواہی دیتا ہوں کہ اللہ کے سوا کوئی معبودِ برحق نہیں، وہ اکیلا ہے، اس کا کوئی شریک نہیں، اور میں گواہی دیتا ہوں کہ محمد ( صلی اللہ علیہ وسلم ) اس کے بندے اور اس کے رسول ہیں؛ جو شخص قیامت کے دن ان کلمات کے ساتھ اس حال میں حاضر ہوا کہ اسے ان میں کوئی شک نہ ہو، تو اللہ اسے جنت میں داخل فرمائے گا۔“
امام طبرانی رحمہ اللہ فرماتے ہیں: ”سہیل سے اس حدیث کو اسماعیل بن جعفر اور عبدالعزیز بن ابی حازم کے علاوہ کسی نے روایت نہیں کیا، اور اسماعیل بن جعفر سے اسے صرف محمد بن جہضم نے روایت کیا ہے۔“ [المعجم الأوسط/باب الألف/حدیث: 1471]