معاویہ بن قرہ المزنی رحمہ اللہ بیان کرتے ہیں کہ سیدنا ابن عباس رضی اللہ عنہما سے بیعِ صرف (سونے چاندی کے تبادلے) کے متعلق سوال کیا جاتا تو وہ اس کا فتویٰ (جواز میں) دیتے تھے، اس پر سیدنا ابوسعید خدری رضی اللہ عنہ نے نہایت سخت کلام کیا، تو سیدنا ابن عباس رضی اللہ عنہما نے دریافت فرمایا: ”یہ کلام کرنے والا کون ہے؟“ لوگوں نے بتایا: ”سیدنا ابوسعید رضی اللہ عنہ ہیں۔“ تب انہوں نے فرمایا: ”میرا یہ گمان نہیں تھا کہ رسول اللہ صلی اللہ علیہ وسلم کے ساتھ میری قرابت کو جانتے ہوئے کوئی شخص اس طرح میرا سامنا کرے گا۔“ سیدنا ابوسعید رضی اللہ عنہ نے فرمایا: ”میں نے رسول اللہ صلی اللہ علیہ وسلم کو اس سے منع فرماتے اور اسے حرام قرار دیتے ہوئے سنا ہے۔“ چنانچہ اس کے بعد سیدنا ابن عباس رضی اللہ عنہما سے جب بھی اس کے بارے میں پوچھا جاتا تو وہ فرماتے: ”ہمیں ایسا شخص ملا جو ہم سے زیادہ صاحبِ علم تھا، اس نے ہمیں (حکمِ نبوی کی) خبر دی تو ہم (اپنے سابقہ موقف سے) باز آگئے۔“
امام طبرانی رحمہ اللہ فرماتے ہیں: ”اس حدیث کو معاویہ بن قرہ رحمہ اللہ سے سوادہ رحمہ اللہ کے علاوہ کسی نے روایت نہیں کیا اور اس کی روایت میں یعقوب رحمہ اللہ منفرد ہیں۔“ [المعجم الأوسط/باب الألف/حدیث: 1538]