سیدنا عبداللہ بن مسعود رضی اللہ عنہ سے روایت ہے کہ انہوں نے فرمایا: ”مجھ سے رسول اللہ صلی اللہ علیہ وسلم نے ارشاد فرمایا: «اقْرَأْ عَلَيَّ» ”مجھے (قرآن) پڑھ کر سناؤ۔“ میں نے عرض کیا: کیا میں آپ کو پڑھ کر سناؤں حالانکہ آپ ہی پر تو یہ نازل کیا گیا ہے؟ آپ صلی اللہ علیہ وسلم نے فرمایا: ”بے شک میں پسند کرتا ہوں کہ اسے اپنے علاوہ کسی اور سے سنوں۔“ چنانچہ میں نے (تلاوت کا) آغاز کیا اور سورہ النساء پڑھنی شروع کی، یہاں تک کہ جب میں اس آیت پر پہنچا: ﴿فَكَيْفَ إِذَا جِئْنَا مِنْ كُلِّ أُمَّةٍ بِشَهِيدٍ وَجِئْنَا بِكَ عَلَى هَؤُلاءِ شَهِيدًا﴾ تو رسول اللہ صلی اللہ علیہ وسلم کی آنکھیں (آنسوؤں سے) چھلک پڑیں، چنانچہ میں رک گیا، تو آپ صلی اللہ علیہ وسلم نے مجھ سے فرمایا: «سَلْ تُعْطَهْ» ”(اب اللہ سے جو چاہو) مانگو، تمہیں عطا کیا جائے گا۔““
امام طبرانی رحمہ اللہ فرماتے ہیں: ”فضیل سے اس حدیث کو صرف ابان نے، ابان سے صرف قاسم نے اور قاسم سے صرف بشر نے روایت کیا ہے، جبکہ اسے ابن الاصفر نے روایت کرنے میں تفرد اختیار کیا ہے۔“
دار الحرمین کے مطبوعہ نسخے میں اسی طرح (ابان بن ثعلبہ) درج ہے، جبکہ درست نام «أبان بن تغلب» ہے جیسا کہ مصنف کی کتاب ”المعجم الصغیر“ میں مذکور ہے، واللہ اعلم۔ [المعجم الأوسط/باب الألف/حدیث: 1587]