سیدنا حذیفہ بن اسید رضی اللہ عنہ سے روایت ہے—میرا خیال ہے کہ انہوں نے اسے رسول اللہ صلی اللہ علیہ وسلم تک مرفوع بیان کیا ہے—کہ انہوں نے فرمایا: ”زمین کا جانور (دابۃ الارض) سب سے زیادہ حرمت والی مسجد سے نکلے گا۔ لوگ بیٹھے ہوں گے کہ اچانک زمین گونجے گی، وہ اسی حالت میں ہوں گے کہ یکایک زمین پھٹ جائے گی۔“
سفیان بن عیینہ رحمہ اللہ نے فرمایا: ”یہ جانور اس وقت برآمد ہوگا جب امام مزدلفہ سے روانہ ہوگا، اور حاجیوں کے آگے چلنے والے (نقیب) کو اسی لیے مقرر کیا گیا ہے تاکہ وہ لوگوں کو خبر دے کہ ابھی جانور نہیں نکلا۔“
امام طبرانی رحمہ اللہ فرماتے ہیں: ”ابن جریج سے اس حدیث کو صرف سفیان رحمہ اللہ نے روایت کیا ہے، اور ان سے اسے بیان کرنے میں حمزہ بن سعید رحمہ اللہ منفرد ہیں۔“ [المعجم الأوسط/باب الألف/حدیث: 1635]