سیدنا عمر بن ابی سلمہ رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم سے سوال کیا: ”کیا روزہ دار (اپنی بیوی کا) بوسہ لے سکتا ہے؟“ تو آپ صلی اللہ علیہ وسلم نے ان سے فرمایا: ”ان سے پوچھو۔“ آپ صلی اللہ علیہ وسلم کا اشارہ ام المومنین سیدہ ام سلمہ رضی اللہ عنہا کی طرف تھا، چنانچہ انہوں نے بتایا کہ رسول اللہ صلی اللہ علیہ وسلم ایسا کرتے تھے۔ اس پر انہوں نے عرض کیا: ”اے اللہ کے رسول! اللہ تعالیٰ نے تو آپ کے اگلے اور پچھلے تمام گناہ معاف فرما دیے ہیں۔“ تو رسول اللہ صلی اللہ علیہ وسلم نے فرمایا: ”بے شک میں تم سب سے زیادہ اللہ سے ڈرنے والا ہوں اور تم سب سے زیادہ اس کی حدود کو جاننے والا ہوں۔“
امام طبرانی رحمہ اللہ فرماتے ہیں: ”یہ حدیث عمر بن ابی سلمہ رضی اللہ عنہ سے، انہوں نے اپنی والدہ ام المومنین سیدہ ام سلمہ رضی اللہ عنہا سے صرف اسی سند کے ساتھ مروی ہے، اور اس کی روایت میں عمرو بن حارث رحمہ اللہ منفرد ہیں۔“ [المعجم الأوسط/باب الألف/حدیث: 1923]