سیدنا عمار بن یاسر رضی اللہ عنہ بیان کرتے ہیں: میں نے رسول اللہ صلی اللہ علیہ وسلم کو سیدنا علی رضی اللہ عنہ سے یہ فرماتے سنا: ”بے شک اللہ تبارک و تعالیٰ نے تمہیں ایسی زینت سے آراستہ کیا ہے کہ بندوں کو ویسی زینت نہیں دی گئی۔ اللہ تعالیٰ نے مسکینوں کی محبت اور ان کے قرب کو تمہارے لیے محبوب بنا دیا، اور تمہیں ان کا ایسا پیشوا بنایا کہ تم ان (کی پیروی) سے راضی ہو، اور انہیں تمہارا ایسا پیروکار بنایا کہ وہ تم سے راضی ہیں۔ پس خوش خبری ہے اس کے لیے جو تم سے محبت رکھے اور تمہارے بارے میں سچ کہے، اور ہلاکت ہے اس کے لیے جو تم سے بغض رکھے اور تم پر جھوٹ باندھے۔ جو تم سے محبت رکھے اور تمہارے بارے میں سچ کہے وہ جنت میں تمہارے گھر کے پڑوسی اور تمہارے رفقاء ہوں گے، اور جو تم سے بغض رکھے اور تم پر جھوٹ باندھے تو اللہ عزوجل پر حق ہے کہ وہ انہیں جھوٹوں کے مقامِ (حشر) میں کھڑا کرے۔“
امام طبرانی رحمہ اللہ فرماتے ہیں: ”یہ حدیث سیدنا عمار رضی اللہ عنہ سے اسی سند کے ساتھ ہی مروی ہے، اس میں محمد بن کثیر منفرد ہیں۔“ [المعجم الأوسط/باب الألف/حدیث: 2157]