سیدنا عبداللہ بن عباس رضی اللہ عنہما بیان کرتے ہیں: سیدنا ابوبکر رضی اللہ عنہ ٹھیک دوپہر کی تپتی گرمی میں (گھر سے) نکلے۔ سیدنا عمر رضی اللہ عنہ نے یہ سنا تو وہ بھی نکل پڑے، اچانک سیدنا ابوبکر رضی اللہ عنہ سے ملاقات ہو گئی۔ انہوں نے پوچھا: ”اے ابوبکر! اس وقت آپ کو کس چیز نے باہر نکالا؟“ انہوں نے کہا: ”اللہ کی قسم! اپنے پیٹ میں شدید بھوک کی جو تکلیف پاتا ہوں اسی نے مجھے نکالا ہے۔“ سیدنا عمر رضی اللہ عنہ نے کہا: ”اللہ کی قسم! مجھے بھی اسی کے سوا کسی چیز نے نہیں نکالا۔“ وہ دونوں اسی حال میں تھے کہ نبی کریم صلی اللہ علیہ وسلم ان کے پاس تشریف لے آئے اور فرمایا: ”اس وقت تم دونوں کو کس چیز نے باہر نکالا؟“ دونوں نے عرض کیا: ”اللہ کی قسم! ہمیں اپنے پیٹوں میں جو شدید بھوک محسوس ہو رہی ہے اسی نے ہمیں نکالا ہے۔“ آپ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے! مجھے بھی اسی کے سوا کسی چیز نے نہیں نکالا، اچھا اٹھو۔“ چنانچہ وہ سب اٹھے اور چل پڑے یہاں تک کہ سیدنا ابو ایوب انصاری رضی اللہ عنہ کے دروازے پر پہنچے۔ سیدنا ابو ایوب رضی اللہ عنہ رسول اللہ صلی اللہ علیہ وسلم کے لیے کھانا یا دودھ بچا کر رکھا کرتے تھے، اس دن آپ صلی اللہ علیہ وسلم کے آنے میں دیر ہو گئی اور آپ صلی اللہ علیہ وسلم اپنے وقت پر نہ پہنچے تو انہوں نے وہ کھانا اپنے گھر والوں کو کھلا دیا اور اپنے کھجور کے باغ میں کام کرنے چلے گئے۔ جب یہ حضرات سیدنا ابو ایوب انصاری رضی اللہ عنہ کے دروازے پر پہنچے تو ان کی اہلیہ باہر آئیں اور کہا: ”خوش آمدید رسول اللہ صلی اللہ علیہ وسلم کو اور ان کے ساتھیوں کو!“ رسول اللہ صلی اللہ علیہ وسلم نے ان سے فرمایا: ”ابو ایوب کہاں ہیں؟“ انہوں نے کہا: ”اے اللہ کے نبی! وہ ابھی آپ کے پاس پہنچتے ہیں۔“ پھر رسول اللہ صلی اللہ علیہ وسلم لوٹے تو سیدنا ابو ایوب رضی اللہ عنہ نے اپنے کھجور کے باغ میں کام کرتے ہوئے آپ صلی اللہ علیہ وسلم کو دیکھ لیا، چنانچہ وہ دوڑتے ہوئے آئے یہاں تک کہ رسول اللہ صلی اللہ علیہ وسلم کو جا لیا اور کہا: ”خوش آمدید اللہ کے نبی صلی اللہ علیہ وسلم کو اور ان کے ساتھیوں کو! اے اللہ کے رسول! یہ وہ وقت نہیں جس میں آپ میرے ہاں تشریف لایا کرتے تھے۔“ پھر وہ آپ صلی اللہ علیہ وسلم کو (گھر کی طرف) واپس لے آئے، اور کھجور کے خوشے کے پاس جا کر اسے کاٹ لائے۔ رسول اللہ صلی اللہ علیہ وسلم نے ان سے فرمایا: ”تمہارا اس سے کیا ارادہ تھا؟“ انہوں نے عرض کیا: ”اے اللہ کے رسول! میں نے چاہا کہ آپ اس میں سے رطب (پکی تازہ کھجوریں)، بسر (ادھ پکی کھجوریں) اور تمر (خشک کھجوریں) سب کھائیں، اور میں اس کے ساتھ آپ کے لیے جانور بھی ذبح کروں گا۔“ آپ صلی اللہ علیہ وسلم نے فرمایا: ”اگر ذبح کرنا ہی ہے تو دودھ دینے والا جانور ذبح نہ کرنا۔“ چنانچہ انہوں نے اپنی بکری کا ایک مادہ بچہ یا نر بچہ لیا اور اسے ذبح کیا، اور اپنی اہلیہ سے کہا: ”تم روٹی پکاؤ اور میں سالن پکاتا ہوں، کیونکہ تم روٹی پکانا مجھ سے بہتر جانتی ہو۔“ پھر انہوں نے آدھا بچہ ہانڈی میں پکایا اور آدھا بھون لیا۔ جب کھانا تیار ہو گیا تو رسول اللہ صلی اللہ علیہ وسلم اور آپ صلی اللہ علیہ وسلم کے صحابہ کرام رضی اللہ عنہم کے سامنے رکھا گیا۔ رسول اللہ صلی اللہ علیہ وسلم نے بکری کے بچے کا گوشت لے کر ایک روٹی پر رکھا اور فرمایا: ”اے ابو ایوب! یہ فاطمہ کو پہنچا دو، کیونکہ انہیں کئی دنوں سے ایسا کھانا نہیں ملا۔“ پھر جب سب نے کھا لیا اور سیر ہو گئے تو نبی کریم صلی اللہ علیہ وسلم نے فرمایا: ”روٹی، گوشت، ادھ پکی کھجوریں، خشک کھجوریں اور تازہ کھجوریں!“ اور آپ صلی اللہ علیہ وسلم کی آنکھوں میں آنسو آ گئے، پھر فرمایا: ”یہی وہ نعمت ہے جس کے بارے میں تم سے قیامت کے دن پوچھا جائے گا۔“ یہ بات صحابہ کرام رضی اللہ عنہم پر بہت گراں گزری۔ تو رسول اللہ صلی اللہ علیہ وسلم نے فرمایا: ”جب تمہیں ایسا کھانا میسر آئے اور تم اس کی طرف ہاتھ بڑھاؤ تو کہو: «بِسْمِ اللهِ وَبَرَكَةِ اللهِ» ”اللہ کے نام سے اور اللہ کی برکت سے۔“ اور جب سیر ہو جاؤ تو کہو: «الْحَمْدُ لِلهِ الَّذِي أَشْبَعَنَا وَأَرْوَانَا وَأَنْعَمَ وَأَفْضَلَ» ”تمام تعریف اللہ کے لیے ہے جس نے ہمیں پیٹ بھر کھلایا، سیراب کیا، نعمت دی اور فضل فرمایا۔“ کیونکہ یہ کلمات اس نعمت (کے شکر) کے لیے کافی ہیں۔“ رسول اللہ صلی اللہ علیہ وسلم کی عادت مبارکہ تھی کہ جو شخص آپ صلی اللہ علیہ وسلم کے ساتھ کوئی نیکی کرتا تو آپ صلی اللہ علیہ وسلم اس کا بدلہ دینا پسند فرماتے، چنانچہ آپ صلی اللہ علیہ وسلم نے سیدنا ابو ایوب رضی اللہ عنہ سے فرمایا: ”کل ہمارے پاس آنا۔“ لیکن انہوں نے سنا نہیں، تو سیدنا عمر رضی اللہ عنہ نے ان سے کہا: ”رسول اللہ صلی اللہ علیہ وسلم تمہیں حکم دے رہے ہیں کہ ان کے پاس آؤ۔“ جب وہ آپ صلی اللہ علیہ وسلم کے پاس آئے تو آپ صلی اللہ علیہ وسلم نے انہیں ایک لونڈی عطا فرمائی اور فرمایا: ”اے ابو ایوب! اس کے ساتھ بھلائی کا برتاؤ کرنا، کیونکہ جب تک وہ ہمارے پاس رہی ہم نے اس میں بھلائی ہی دیکھی۔“ پھر جب سیدنا ابو ایوب رضی اللہ عنہ اسے لے کر آئے تو کہنے لگے: ”رسول اللہ صلی اللہ علیہ وسلم کی وصیت پر عمل کرنے کے لیے میں اسے آزاد کر دینے سے بہتر کوئی صورت نہیں پاتا۔“ چنانچہ انہوں نے اسے آزاد کر دیا۔
(امام طبرانی رحمہ اللہ کے بقول) ”اس حدیث کو عبداللہ بن کیسان سے فضل بن موسیٰ کے سوا کسی نے روایت نہیں کیا۔“ [المعجم الأوسط/باب الألف/حدیث: 2247]