سیدنا معاذ بن جبل رضی اللہ عنہ سے روایت ہے کہ انہوں نے فرمایا: ”ہم نے رسول اللہ صلی اللہ علیہ وسلم کے ہمراہ ایک سفر میں ابر آلود دن قبلہ کے علاوہ دوسری سمت رخ کر کے نماز پڑھی، پھر جب آپ صلی اللہ علیہ وسلم نماز مکمل کر کے سلام پھیر چکے تو سورج نمودار ہو گیا، ہم نے عرض کی: اے اللہ کے رسول! ہم نے قبلہ کے علاوہ دوسری سمت رخ کر کے نماز پڑھ لی ہے، تو آپ صلی اللہ علیہ وسلم نے ارشاد فرمایا: «قَدْ رُفِعَتْ صَلَاتُكُمْ بِحَقِّهَا إِلَى اللهِ عَزَّ وَجَلَّ» ”تمہاری نماز اللہ عزوجل کی بارگاہ میں اپنے حق کے ساتھ بلند کر دی گئی ہے۔““
امام طبرانی رحمہ اللہ فرماتے ہیں: ”اس حدیث کو ابراہیم بن ابی عبلہ رحمہ اللہ سے صرف اسماعیل بن عبداللہ رحمہ اللہ نے، اور اسماعیل رحمہ اللہ سے صرف ابو داؤد رحمہ اللہ نے روایت کیا ہے، جبکہ اسے بیان کرنے میں ہشام بن سلام رحمہ اللہ منفرد ہیں۔“ [المعجم الأوسط/باب الألف/حدیث: 246]