سیدنا عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھے سورہ ”حم“ پڑھائی، پھر میں مسجد کی طرف گیا تو وہاں اہلِ مسجد میں سے ایک آدمی ملا، میں نے اس سے پوچھا: ”کیا تم یہ سورت پڑھتے ہو؟“ اس نے کہا: ”ہاں“، پھر اس نے ایسی قراءت کی جو میں نہیں پڑھتا تھا۔ میں نے پوچھا: ”تمہیں کس نے پڑھائی؟“ اس نے کہا: ”رسول اللہ صلی اللہ علیہ وسلم نے۔“ میں نے کہا: ”مجھے بھی رسول اللہ صلی اللہ علیہ وسلم نے پڑھائی ہے۔“ پھر میں ایک اور شخص سے ملا اور اس سے پوچھا: ”کیا تم یہ سورت پڑھتے ہو؟“ اس نے کہا: ”ہاں۔“ میں نے کہا: ”پڑھو۔“ تو وہ میرے ساتھی (پہلے آدمی) ہی کی طرح پڑھ رہا تھا۔ میں نے پوچھا: ”تمہیں کس نے پڑھائی؟“ اس نے کہا: ”نبی صلی اللہ علیہ وسلم نے۔“ میں نے کہا: ”اور مجھے بھی رسول اللہ صلی اللہ علیہ وسلم نے پڑھائی ہے۔“ پھر میں نبی صلی اللہ علیہ وسلم کے پاس گیا، آپ صلی اللہ علیہ وسلم تشریف فرما تھے، میں نے عرض کیا: ”اس شخص نے قراءت میں میرے خلاف پڑھا ہے۔“ تو آپ صلی اللہ علیہ وسلم کا چہرۂ مبارک متغیر ہو گیا اور آپ صلی اللہ علیہ وسلم ناراض ہوئے، پھر آپ صلی اللہ علیہ وسلم نے سیدنا علی رضی اللہ عنہ کی طرف اشارہ فرمایا، جو آپ صلی اللہ علیہ وسلم کے پاس موجود تھے، اور رسول اللہ صلی اللہ علیہ وسلم نے کچھ ارشاد فرمایا۔ پھر سیدنا علی رضی اللہ عنہ نے کہا: ”رسول اللہ صلی اللہ علیہ وسلم حکم دیتے ہیں کہ تم میں سے ہر شخص اسی طرح پڑھے جیسے اسے سکھایا گیا ہے، کیونکہ تم سے پہلے لوگ آپس کے اختلاف ہی کی وجہ سے ہلاک ہوئے۔“
امام طبرانی رحمہ اللہ فرماتے ہیں: ”اس حدیث کو ابو خالد دالانی سے عبدالسلام بن حرب کے سوا کسی نے روایت نہیں کیا، جبکہ اسے اعمش نے بھی عاصم سے روایت کیا ہے۔“
اور اعمش کے علاوہ دوسروں نے بھی اسے روایت کیا ہے۔ [المعجم الأوسط/باب الحاء/حدیث: 3418]