سیدنا جابر رضی اللہ عنہما بیان کرتے ہیں کہ نبی کریم صلی اللہ علیہ وسلم کے سامنے ایک آدمی پیش کیا گیا جس نے دوسرے آدمی کی ران میں سینگ سے وار کیا تھا۔ جس کی ران میں وار کیا گیا تھا اس نے کہا: ”اے اللہ کے رسول! مجھے قصاص دلوائیے۔“ تو رسول اللہ صلی اللہ علیہ وسلم نے فرمایا: ”اس کا علاج کرو اور انتظار کرو یہاں تک کہ ہم دیکھ لیں کہ اس کا انجام کیا ہوتا ہے۔“ اس آدمی نے پھر کہا: ”اے اللہ کے رسول! مجھے قصاص دلوائیے۔“ تو آپ صلی اللہ علیہ وسلم نے اسے پھر وہی بات فرمائی۔ اس نے پھر کہا: ”اے اللہ کے رسول! مجھے قصاص دلوائیے۔“ چنانچہ رسول اللہ صلی اللہ علیہ وسلم نے اسے قصاص دلوا دیا۔ پھر جس نے قصاص لیا تھا اس کی ٹانگ سوکھ گئی اور جس سے قصاص لیا گیا تھا وہ تندرست ہو گیا، تو رسول اللہ صلی اللہ علیہ وسلم نے اس (ٹانگ) کی دیت ساقط قرار دی۔
امام طبرانی رحمہ اللہ فرماتے ہیں: ”اس حدیث کو زید بن ابی انیسہ سے محمد بن عبداللہ ذماری کے سوا کسی نے روایت نہیں کیا، اور سلیمان بن عبدالرحمن اسے بیان کرنے میں منفرد ہیں۔“ [المعجم الأوسط/باب الحاء/حدیث: 3460]