سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”میں احمد ہوں، میں محمد ہوں، میں حاشر ہوں کہ لوگ میرے قدموں پر اکٹھے کیے جائیں گے، اور میں ماحی ہوں کہ اللہ میرے ذریعے سے کفر کو مٹا دیتا ہے۔ پھر جب قیامت کا دن ہوگا تو حمد کا جھنڈا میرے ہاتھ میں ہوگا، اور میں رسولوں کا امام اور ان کی شفاعت کرنے والا ہوں گا۔“
امام طبرانی رحمہ اللہ فرماتے ہیں: ”اس حدیث کو سیدنا جابر بن عبداللہ رضی اللہ عنہما سے عبداللہ بن محمد بن عقیل کے سوا کسی نے روایت نہیں کیا، اور نہ ابن عقیل سے عبیداللہ بن عمرو کے سوا کسی نے، اور قاسم نے بھی عبداللہ بن محمد بن عقیل سے روایت کیا ہے۔“ [المعجم الأوسط/باب الخاء/حدیث: 3570]