سیدنا انس بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم کی باندی سیدہ ام ابراہیم رضی اللہ عنہا اپنے بالا خانے میں رہتی تھیں، اور ایک قبطی شخص ان کے پاس آ کر ٹھہرتا اور ان کے لیے پانی اور لکڑیاں لایا کرتا تھا۔ لوگوں نے اس بارے میں باتیں بنائیں کہ ایک عجمی مرد ایک عجمی عورت کے پاس آتا جاتا ہے۔ یہ بات نبی صلی اللہ علیہ وسلم تک پہنچی تو آپ صلی اللہ علیہ وسلم نے سیدنا علی بن ابی طالب رضی اللہ عنہ کو بھیجا اور اسے قتل کرنے کا حکم دیا۔ وہ گئے تو اسے کھجور کے ایک درخت پر پایا۔ جب قبطی نے سیدنا علی رضی اللہ عنہ کے ساتھ تلوار دیکھی تو گھبرا کر نیچے گر پڑا اور اپنی اوڑھی ہوئی چادر پھینک کر سامنے آ گیا، تو دیکھا کہ وہ تو آلۂ تناسل سے محروم ہے۔ سیدنا علی رضی اللہ عنہ نبی صلی اللہ علیہ وسلم کے پاس لوٹ آئے اور عرض کیا: ”اے اللہ کے رسول! آپ کا کیا خیال ہے کہ اگر آپ ہم میں سے کسی کو کوئی حکم دیں، پھر وہ (حقیقتِ حال) اس کے برعکس دیکھے تو کیا وہ آپ سے رجوع کر سکتا ہے؟“ آپ صلی اللہ علیہ وسلم نے فرمایا: ”ہاں۔“ پھر انہوں نے قبطی کے بارے میں جو کچھ دیکھا تھا، آپ صلی اللہ علیہ وسلم کو بتا دیا۔ سیدنا انس رضی اللہ عنہ کہتے ہیں: پھر سیدہ ام ابراہیم رضی اللہ عنہا نے ابراہیم رضی اللہ عنہ کو جنم دیا، اور نبی صلی اللہ علیہ وسلم کو ان کے بارے میں کچھ شبہ رہا، یہاں تک کہ جبریل علیہ السلام آپ صلی اللہ علیہ وسلم کے پاس آئے اور کہا: «السَّلَامُ عَلَيْكَ يَا أَبَا إِبْرَاهِيمَ» ”اے ابراہیم کے والد! آپ پر سلام ہو۔“ تب آپ صلی اللہ علیہ وسلم کو اس بارے میں اطمینان ہو گیا۔
امام طبرانی رحمہ اللہ فرماتے ہیں: ”اس حدیث کو زہری سے یزید بن ابی حبیب اور عقیل بن خالد کے سوا کسی نے روایت نہیں کیا، اور ان دونوں سے روایت کرنے میں ابن لہیعہ منفرد ہیں۔“ [المعجم الأوسط/باب الطاء/حدیث: 3687]