سیدنا حذیفہ رضی اللہ عنہ سے روایت ہے کہ ہم نبی کریم صلی اللہ علیہ وسلم کی خدمت میں حاضر تھے کہ ایک سائل ہمارے سامنے آ کھڑا ہوا، لوگ خاموش رہے، اس نے پھر سوال کیا تو بعض لوگوں نے اسے انگوٹھی یا کوئی اور چیز دے دی، پھر دوسرے لوگ بھی پے در پے دینے لگے اور انہوں نے اسے دے دیا۔ تب رسول اللہ صلی اللہ علیہ وسلم نے فرمایا: ”جس نے کوئی اچھا طریقہ جاری کیا اور اس کی پیروی کی گئی تو اسے اپنا اجر بھی ملے گا اور ان لوگوں کے اجر کے برابر بھی جنہوں نے اس میں اس کی پیروی کی، جبکہ ان کے اجر میں کچھ بھی کمی نہیں کی جائے گی۔ اور جس نے کوئی برا طریقہ جاری کیا اور اس کی پیروی کی گئی تو اس پر اس کا اپنا بوجھ بھی ہوگا اور ان لوگوں کے بوجھ کے برابر بھی جنہوں نے اس میں اس کی پیروی کی، جبکہ ان کے بوجھ میں کچھ بھی کمی نہیں کی جائے گی۔“
امام طبرانی رحمہ اللہ فرماتے ہیں: ”خالد الحذاء سے یہ حدیث علی بن عاصم کے سوا کسی نے روایت نہیں کی۔“ [المعجم الأوسط/باب العين/حدیث: 3693]