رجاء رحمہ اللہ بیان کرتے ہیں: ”میں رسول اللہ صلی اللہ علیہ وسلم کی مسجد میں ایک حلقے میں بیٹھا تھا جس میں سیدنا ابو سعید خدری رضی اللہ عنہ اور سیدنا عبداللہ بن عمرو رضی اللہ عنہما بھی تھے کہ اتنے میں سیدنا حسین بن علی رضی اللہ عنہما گزرے اور سلام کیا۔ لوگوں نے جواب دیا، مگر سیدنا عبداللہ بن عمرو رضی اللہ عنہما خاموش رہے۔ پھر جب لوگ خاموش ہو گئے تو انہوں نے آواز بلند کر کے کہا: ”وَعَلَيْكَ السَّلَامُ وَرَحْمَةُ اللهِ وَبَرَكَاتُهُ“۔ پھر لوگوں کی طرف متوجہ ہو کر فرمایا: ”کیا میں تمہیں نہ بتاؤں کہ زمین والوں میں آسمان والوں کو سب سے محبوب کون ہے؟“ لوگوں نے کہا: ”ضرور بتائیے۔“ انہوں نے کہا: ”یہ پیٹھ پھیر کر جانے والے شخص (حسین رضی اللہ عنہ)۔ اللہ کی قسم! جنگِ صفین کی راتوں سے لے کر آج تک نہ میں نے ان سے ایک بات کی ہے اور نہ انہوں نے مجھ سے۔ اور اللہ کی قسم! ان کا مجھ سے راضی ہو جانا مجھے اس بات سے زیادہ محبوب ہے کہ میرے پاس احد پہاڑ جتنا (مال) ہو۔“
سیدنا ابو سعید خدری رضی اللہ عنہ نے ان سے کہا: ”کیا آپ صبح ان کے پاس نہیں جاتے؟“ انہوں نے کہا: ”کیوں نہیں۔“ چنانچہ دونوں نے صبح سویرے جانے کا وعدہ کیا اور میں بھی ان کے ساتھ گیا۔ سیدنا ابو سعید رضی اللہ عنہ نے اجازت مانگی تو انہیں اجازت مل گئی، ہم اندر داخل ہوئے، پھر انہوں نے سیدنا ابن عمرو رضی اللہ عنہما کے لیے اجازت طلب کی اور برابر اصرار کرتے رہے یہاں تک کہ سیدنا حسین رضی اللہ عنہ نے انہیں اجازت دے دی، چنانچہ وہ داخل ہوئے۔ جب سیدنا ابو سعید رضی اللہ عنہ نے انہیں دیکھا تو ان کے لیے جگہ چھوڑ کر کھسک گئے، وہ سیدنا حسین رضی اللہ عنہ کے پہلو میں بیٹھے تھے، سیدنا حسین رضی اللہ عنہ نے انہیں اپنی طرف کھینچا، مگر سیدنا ابن عمرو رضی اللہ عنہما کھڑے رہے اور نہ بیٹھے۔ جب سیدنا حسین رضی اللہ عنہ نے یہ دیکھا تو سیدنا ابو سعید رضی اللہ عنہ کو چھوڑ دیا، چنانچہ وہ ان کے لیے (مزید) ہٹ گئے اور وہ (ابن عمرو) ان دونوں کے درمیان بیٹھ گئے۔ پھر سیدنا ابو سعید رضی اللہ عنہ نے سارا قصہ بیان کیا اور (سیدنا حسین رضی اللہ عنہ نے) فرمایا: ”اے ابن عمرو! کیا واقعی ایسا ہے؟ کیا آپ جانتے ہیں کہ میں زمین والوں میں آسمان والوں کو سب سے زیادہ محبوب ہوں؟“ انہوں نے کہا: ”جی ہاں، ربِ کعبہ کی قسم! آپ زمین والوں میں آسمان والوں کو سب سے زیادہ محبوب ہیں۔“ حسین رضی اللہ عنہ نے فرمایا: ”پھر کس چیز نے آپ کو آمادہ کیا کہ آپ نے صفین کے دن مجھ سے اور میرے والد سے جنگ کی؟ اللہ کی قسم! میرے والد مجھ سے بہتر تھے۔“
انہوں نے کہا: ”بجا فرمایا، لیکن میرے والد عمرو رضی اللہ عنہ نے رسول اللہ صلی اللہ علیہ وسلم سے میری شکایت کی اور کہا: ’عبداللہ رات بھر قیام کرتا ہے اور دن بھر روزہ رکھتا ہے۔‘ تو رسول اللہ صلی اللہ علیہ وسلم نے فرمایا: ”نماز بھی پڑھو اور سوؤ بھی، روزہ بھی رکھو اور افطار بھی کرو، اور عمرو کی اطاعت کرو۔“ پھر جب صفین کا دن آیا تو انہوں نے مجھے قسم دے دی (کہ میں ان کے ساتھ جاؤں)۔ اللہ کی قسم! میں نے نہ ان کی تعداد بڑھائی، نہ ان کے لیے تلوار سونتی، نہ نیزہ مارا اور نہ تیر چلایا۔“ سیدنا حسین رضی اللہ عنہ نے ان سے فرمایا: ”کیا آپ کو معلوم نہیں کہ خالق کی نافرمانی میں کسی مخلوق کی اطاعت نہیں؟“ انہوں نے کہا: ”کیوں نہیں (معلوم ہے)۔“ راوی کہتے ہیں: ”گویا سیدنا حسین رضی اللہ عنہ نے ان کا عذر قبول کر لیا۔“
امام طبرانی رحمہ اللہ فرماتے ہیں: ”اس حدیث کو اسماعیل بن رجاء سے ہاشم بن برید کے سوا کسی نے روایت نہیں کیا، اور ہاشم سے ان کے بیٹے علی بن ہاشم کے سوا کسی نے روایت نہیں کیا، اس میں عباد بن یعقوب منفرد ہیں۔“ [المعجم الأوسط/باب العين/حدیث: 3917]