سیدنا ابوذر رضی اللہ عنہ سے روایت ہے کہ رسول اللہ صلی اللہ علیہ وسلم نے صدقات جمع کرنے کا حکم دیا، تو لوگ اپنے اپنے مال کے حساب سے اپنا صدقہ لانے لگے، (یہ دیکھ کر) میں رو پڑا۔ آپ صلی اللہ علیہ وسلم نے فرمایا: ”اے ابوذر! تم کیوں رو رہے ہو؟“ میں نے عرض کیا: ”مال دار لوگ تو سارا اجر لے گئے۔“ آپ صلی اللہ علیہ وسلم نے فرمایا: ”وہ کیسے؟“ میں نے عرض کیا: ”وہ بھی ہماری طرح نماز پڑھتے ہیں اور ہماری طرح روزے رکھتے ہیں، مگر انھیں صدقہ کرنے کے لیے مال میسر ہے اور ہمیں میسر نہیں۔“ تو آپ صلی اللہ علیہ وسلم نے فرمایا: ”بلکہ زیادہ مال والے ہی (قیامت کے دن) پست درجے والے ہوں گے، سوائے اس کے جس نے مال کو یوں یوں (دائیں بائیں، دونوں ہاتھوں سے) خرچ کیا، اور ایسے لوگ بہت کم ہیں۔“
میں نے عرض کیا: ”اللہ کے رسول! وہ کیسے؟“ آپ صلی اللہ علیہ وسلم نے فرمایا: ”جس اونٹوں والے نے ان کی زکوٰۃ ادا نہ کی، خواہ وہ دودھ کی فراوانی اور آسانی کی حالت میں ہوں یا سختی و تنگی کی حالت میں، تو وہ اونٹ قیامت کے دن ایک ہموار کشادہ میدان میں آئیں گے اور اپنے کھروں سے اسے روندیں گے، جب ان کا پہلا حصہ گزر جائے گا تو آخری حصہ پھر اس پر لوٹ آئے گا، یہاں تک کہ لوگوں کے درمیان فیصلہ کر دیا جائے۔“ میں نے عرض کیا: ”اللہ کے رسول! گھوڑوں کا کیا حکم ہے؟“ آپ صلی اللہ علیہ وسلم نے فرمایا: ”گھوڑے تین طرح کے لوگوں کے لیے ہیں: جس نے انھیں اللہ کی راہ میں (جہاد کی) تیاری کے لیے رکھا، تو ان کی تنگی اور آسانی (کی ہر حالت) اس کے لیے (اجر کا باعث) ہے، اور اللہ کی قسم! اگر وہ گھوڑا کشادہ میدان طے کرتا ہوا ایک دو ٹیلوں پر دوڑ کر چڑھے اور پھر کسی سرسبز چراگاہ میں اترے (تو اس کا سارا اجر اس مالک کو ملتا ہے)، اور جس نے انھیں اِترانے اور فخر و غرور کے لیے رکھا تو وہ قیامت کے دن اس کے لیے وبال بن جائیں گے۔“ صحابہ کرام رضی اللہ عنہم نے عرض کیا: ”اللہ کے نبی! گدھوں کا کیا حکم ہے؟“ آپ صلی اللہ علیہ وسلم نے فرمایا: ”ان کے بارے میں اللہ تعالیٰ نے کوئی خاص حکم نازل نہیں فرمایا، سوائے اس بے مثال جامع آیت کے: ﴿فَمَنْ يَعْمَلْ مِثْقَالَ ذَرَّةٍ خَيْرًا يَرَهُ ۞ وَمَنْ يَعْمَلْ مِثْقَالَ ذَرَّةٍ شَرًّا يَرَهُ﴾ ”پھر جو کوئی ذرہ برابر نیکی کرے گا وہ اسے دیکھ لے گا، اور جو کوئی ذرہ برابر برائی کرے گا وہ اسے دیکھ لے گا۔““
امام طبرانی رحمہ اللہ فرماتے ہیں: ”اس حدیث کو جیفر بن حکم سے ابو احمد زبیری کے سوا کسی نے روایت نہیں کیا، اور ان سے روایت کرنے میں ان کے بیٹے طاہر منفرد ہیں۔“ [المعجم الأوسط/باب العين/حدیث: 4037]