ام المومنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم کے پاس ایک آدمی آیا، اس کے ساتھ ایک بزرگ بھی تھے، تو آپ صلی اللہ علیہ وسلم نے فرمایا: ”اے فلاں! یہ تمہارے ساتھ کون ہیں؟“ اس نے عرض کیا: ”میرے والد ہیں۔“ آپ صلی اللہ علیہ وسلم نے فرمایا: ”تو ان کے آگے آگے نہ چلنا، ان سے پہلے نہ بیٹھنا، انہیں نام لے کر نہ پکارنا، اور ان کو گالی گلوچ کا نشانہ نہ بنوانا۔“
امام طبرانی رحمہ اللہ فرماتے ہیں: ”یہ حدیث ہشام سے صرف محمد بن حسن نے روایت کی ہے، اس میں عمرو بن محمد بن عرعرہ منفرد ہیں، اور رسول اللہ صلی اللہ علیہ وسلم سے یہ حدیث صرف اسی سند سے مروی ہے۔“ [المعجم الأوسط/باب العين/حدیث: 4159]