سیدنا زارع رضی اللہ عنہ سے روایت ہے—اور وہ وفدِ عبد القیس میں شامل تھے—انہوں نے فرمایا: جب ہم مدینہ منورہ پہنچے تو ہم اپنی سواریوں سے جلدی جلدی اترنے لگے اور نبی صلی اللہ علیہ وسلم کے دستِ مبارک اور پائے مبارک کا بوسہ لینے لگے، جبکہ سیدنا منذر اشج رضی اللہ عنہ رکے رہے یہاں تک کہ وہ اپنے سامان کے پاس آئے، اپنا لباس پہنا، پھر نبی صلی اللہ علیہ وسلم کی خدمت میں حاضر ہوئے۔ تو نبی صلی اللہ علیہ وسلم نے ان سے فرمایا: ”تمہارے اندر دو ایسی خصلتیں ہیں جنہیں اللہ عزوجل پسند فرماتا ہے: بردباری اور وقار (تحمل)۔“ اس پر سیدنا منذر رضی اللہ عنہ نے عرض کیا: «الْحَمْدُ لِلهِ الَّذِي جَبَلَنِي عَلَى خَلَّتَيْنِ يُحِبُّهُمَا اللهُ وَرَسُولُهُ» ”تمام تعریف اس اللہ کے لیے ہے جس نے مجھے ان دو خصلتوں کی فطرت پر پیدا کیا جنہیں اللہ اور اس کا رسول پسند فرماتے ہیں۔“
اس حدیث کو ام ابان رحمہا اللہ سے صرف مطر بن عبد الرحمن رحمہ اللہ نے روایت کیا ہے۔ [المعجم الأوسط/باب الألف/حدیث: 418]