سیدنا طفیل بن عمرو الدوسی رضی اللہ عنہ سے روایت ہے کہ انہوں نے فرمایا: سیدنا ابی بن کعب رضی اللہ عنہ نے مجھے قرآن پڑھایا، تو میں نے انہیں ہدیہ کے طور پر ایک کمان دی، پھر وہ صبح کے وقت نبی صلی اللہ علیہ وسلم کی بارگاہ میں اس حال میں حاضر ہوئے کہ وہ کمان ان کے گلے میں حمائل تھی، تو نبی صلی اللہ علیہ وسلم نے ان سے فرمایا: ”تم نے اسے جہنم (کی آگ) سے اپنے گلے میں لٹکایا ہے۔“ میں نے عرض کیا: اے اللہ کے رسول! بسا اوقات ہم ان کے ہاں کھانے میں شریک ہوتے ہیں اور اس میں سے کھا لیتے ہیں۔ تو آپ صلی اللہ علیہ وسلم نے فرمایا: ”جہاں تک اس کھانے کا تعلق ہے جو خاص تمہارے لیے (قرآن پڑھانے کے بدلے) تیار کیا گیا ہو، تو اسے کھا کر تم اپنا (اخروی) حصہ ہی کھاؤ گے، البتہ جو دوسروں کے لیے تیار کیا گیا ہو اور تم وہاں موجود ہو کر اس میں سے کھا لو تو اس میں کوئی حرج نہیں ہے۔“
امام طبرانی رحمہ اللہ فرماتے ہیں: ”یہ حدیث طفیل بن عمرو رضی اللہ عنہ سے صرف اسی سند کے ساتھ مروی ہے، اور اسماعیل بن عیاش رحمہ اللہ اسے روایت کرنے میں منفرد ہیں۔“
دار الحرمین کے نسخے میں اسی طرح (عبداللہ بن سلیمان) ہے، اور غالباً درست نام «عبد ربہ» ہے۔ [المعجم الأوسط/باب الألف/حدیث: 439]