سیدنا جابر رضی اللہ عنہما بیان کرتے ہیں کہ سیدنا ابو شعیب رضی اللہ عنہ کا ایک قصاب غلام تھا۔ جب انہوں نے رسول اللہ صلی اللہ علیہ وسلم پر (بھوک کی) مشقت اور تکلیف کے آثار دیکھے تو اپنے غلام کو حکم دیا کہ پانچ آدمیوں کے لیے کافی کھانا تیار کرے۔ پھر انہوں نے رسول اللہ صلی اللہ علیہ وسلم کی طرف پیغام بھیجا کہ آپ صلی اللہ علیہ وسلم پانچویں شخص کے طور پر ہمارے ہاں تشریف لائیں۔ رسول اللہ صلی اللہ علیہ وسلم (ان کے ہاں جانے کے لیے) اٹھے تو ایک اور آدمی بھی ان کے پیچھے ہو لیا۔ جب آپ صلی اللہ علیہ وسلم ان کے دروازے پر پہنچے تو فرمایا: ”آپ نے مجھے پیغام بھیجا تھا کہ میں پانچویں شخص کے طور پر آؤں، اور یہ آدمی ہمارے پیچھے چلا آیا ہے، اگر آپ اسے اجازت دیں تو یہ اندر آ جائے، ورنہ لوٹ جائے۔“ انہوں نے عرض کیا: ”میں نے اسے اجازت دے دی، اب یہ واپس نہ جائے۔“
امام طبرانی رحمہ اللہ فرماتے ہیں: ”اعمش سے، انہوں نے ابو سفیان سے اس حدیث کو زہیر کے سوا کسی نے روایت نہیں کیا۔ اور اسے امام ثوری رحمہ اللہ نے اعمش سے، انہوں نے ابو وائل سے، انہوں نے سیدنا ابو مسعود رضی اللہ عنہ سے روایت کیا ہے۔“ [المعجم الأوسط/باب الميم/حدیث: 5019]