سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اس ذات کی قسم جس نے مجھے حق کے ساتھ مبعوث فرمایا! دنیا اس وقت تک ختم نہیں ہوگی جب تک ان لوگوں پر زمین میں دھنسائے جانے، صورتیں مسخ ہونے اور پتھروں کی بارش کے عذاب نہ آ جائیں۔“ صحابہ نے عرض کیا: ”اے اللہ کے نبی! یہ کب ہوگا؟“ آپ صلی اللہ علیہ وسلم نے فرمایا: ”جب تم دیکھو کہ عورتیں زینوں پر سوار ہونے لگیں، گانے والی لونڈیاں کثرت سے ہو جائیں، جھوٹی گواہیاں دی جانے لگیں، نماز پڑھنے والے مشرکین کے برتنوں یعنی سونے اور چاندی کے برتنوں میں پینے لگیں، مرد مردوں سے اور عورتیں عورتوں سے شہوت پوری کرنے لگیں، تو پھر (اس وقت) تم (عذاب کے لیے) کمر کس لو اور تیار ہو جاؤ۔“ اور آپ صلی اللہ علیہ وسلم نے اپنے ہاتھ سے اشارہ کیا اور اسے اپنی پیشانی پر رکھ کر چہرہ مبارک کو ڈھانپ لیا۔ [المعجم الأوسط/باب الميم/حدیث: 5061]