طارق بن شہاب رحمہ اللہ سے روایت ہے کہ رسول اللہ صلی اللہ علیہ وسلم سے پوچھا گیا: ”ملأ اعلیٰ (بلند مرتبہ فرشتے) کس بات میں بحث و تکرار کرتے ہیں؟“ تو آپ صلی اللہ علیہ وسلم نے فرمایا: ”کفارات اور درجات کے بارے میں۔ درجات یہ ہیں: کھانا کھلانا، سلام کو عام کرنا، اور رات کو اس وقت نماز پڑھنا جب لوگ سوئے ہوئے ہوں۔ اور کفارات یہ ہیں: سخت سردی کی ٹھنڈک (اور ناگواری) کے باوجود اچھی طرح وضو کرنا، جماعتوں کی طرف قدم اٹھا کر چلنا، اور ایک نماز کے بعد دوسری نماز کا انتظار کرنا۔“
امام طبرانی رحمہ اللہ فرماتے ہیں: ”اس حدیث کو ابو سعد بقال سے قاسم بن مالک کے سوا کسی نے روایت نہیں کیا، اور اس میں ابن ابی المغراء منفرد ہیں۔“ [المعجم الأوسط/باب الميم/حدیث: 5496]