سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”مجھے مٹھی بھر کنکریاں پکڑاؤ۔“ چنانچہ میں نے آپ صلی اللہ علیہ وسلم کو پکڑا دیں تو آپ صلی اللہ علیہ وسلم نے انہیں دشمن قوم کے چہروں کی طرف پھینک دیا، پھر قوم میں سے کوئی بھی ایسا نہ بچا جس کی آنکھیں کنکریوں سے بھر نہ گئی ہوں، تب یہ آیت نازل ہوئی: ﴿وَمَا رَمَيْتَ إِذْ رَمَيْتَ وَلَكِنَّ اللَّهَ رَمَى﴾ ”اور (اے نبی!) جب آپ نے (کنکریاں) پھینکیں تو آپ نے نہیں پھینکیں بلکہ اللہ نے پھینکیں۔“
امام طبرانی رحمہ اللہ فرماتے ہیں: ”اس حدیث کو سماک بن حرب سے سلیمان بن قرم کے سوا کسی نے روایت نہیں کیا، اور سلیمان سے یحییٰ بن یعلیٰ کے سوا کسی نے روایت نہیں کیا، اور اس میں قاسم بن ابی شیبہ منفرد ہیں۔“ [المعجم الأوسط/باب الميم/حدیث: 5502]