سیدنا عبداللہ بن عباس رضی اللہ عنہما سے روایت ہے کہ نبی کریم صلی اللہ علیہ وسلم ایک سفر میں تھے، آپ صلی اللہ علیہ وسلم کے صحابہ رضی اللہ عنہم نے رات کے آخر میں پڑاؤ ڈالا (اور سو گئے) تو انہیں سورج (کی دھوپ) ہی نے جگایا۔ پھر آپ صلی اللہ علیہ وسلم اٹھے اور مؤذن کو حکم دیا تو اس نے اذان کہی اور اقامت کہی اور آپ صلی اللہ علیہ وسلم نے نماز پڑھائی۔
اور امام مسروق رحمہ اللہ نے کہا: ”مجھے یہ پسند نہیں کہ مجھے ساری دنیا اور جو کچھ اس میں ہے مل جائے (اور اس کے بدلے) میں رسول اللہ صلی اللہ علیہ وسلم کی سورج نکلنے کے بعد والی اس نماز (کی فضیلت چھوڑ دوں)۔“
امام طبرانی رحمہ اللہ فرماتے ہیں: ”اس حدیث کو مسروق سے تمیم بن سلمہ کے سوا کسی نے روایت نہیں کیا، اور تمیم سے یزید بن ابی زیاد کے سوا کسی نے نہیں، اور اس میں عبیدہ بن حمید منفرد ہیں۔ مسروق نے ابن عباس رضی اللہ عنہما سے اس کے سوا کوئی حدیث روایت نہیں کی۔“ [المعجم الأوسط/باب الميم/حدیث: 5556]