سیدنا عمر بن خطاب رضی اللہ عنہ سے روایت ہے کہ انہوں نے فرمایا: ”اے لوگو! عورتوں کے مہر (مقرر کرنے) میں مبالغہ نہ کرو، کیونکہ اگر یہ دنیا میں باعثِ عزت و شرافت ہوتا یا اللہ کے ہاں تقویٰ کی علامت ہوتی تو رسول اللہ صلی اللہ علیہ وسلم اس کے سب سے زیادہ حقدار ہوتے؛ رسول اللہ صلی اللہ علیہ وسلم نے اپنی ازواجِ مطہرات میں سے کسی کے ساتھ نکاح کیا اور نہ اپنی صاحبزادیوں میں سے کسی کا نکاح کیا مگر بارہ اوقیہ اور ایک «نش» (آدھا اوقیہ) کے عوض۔ اور بے شک تم میں سے ایک شخص عورت کے مہر میں اس قدر مبالغہ کرتا ہے یہاں تک کہ وہ کہہ اٹھتا ہے: میں نے تیری خاطر مشکیزے کے تسمے (جتنی مشقت) برداشت کی ہے۔“
ابوالعجفاء السلمی رحمہ اللہ کہتے ہیں کہ میں اس وقت ایک نو عمر لڑکا تھا، چنانچہ میں نہیں سمجھ سکا کہ «علق القربة» (مشکیزے کا تسمہ) سے کیا مراد ہے؟
امام طبرانی رحمہ اللہ فرماتے ہیں: ”یہ احادیث مغیرہ رحمہ اللہ سے سوید بن عبدالعزیز رحمہ اللہ کے علاوہ کسی نے روایت نہیں کیں۔“ [المعجم الأوسط/باب الألف/حدیث: 570]