سیدنا جابر بن عبداللہ رضی اللہ عنہما سے روایت ہے کہ دو بھائیوں کی مشترکہ زمین تھی، ان میں سے ایک نے اپنے حصے کی زمین اپنی ماں کو عمری کے طور پر دے دی، پھر وہ فوت ہو گئی تو رسول اللہ صلی اللہ علیہ وسلم نے ان دونوں کے درمیان (اس زمین کو) تقسیم فرما دیا۔
امام طبرانی رحمہ اللہ فرماتے ہیں: ”اس حدیث کو زفر سے انصاری کے سوا کسی نے روایت نہیں کیا، اور زفر نے اس حدیث کی سند سے دو آدمی ساقط کر دیے ہیں، کیونکہ ثوری اور قیس بن ربیع نے اسے حبیب بن ابی ثابت سے، انھوں نے حمید اعرج سے، انھوں نے مکہ کے قاضی طارق سے، اور انھوں نے جابر رضی اللہ عنہما سے روایت کیا ہے۔“ [المعجم الأوسط/باب الميم/حدیث: 6042]