سیدنا عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم مسجد میں تشریف لائے اور آپ صلی اللہ علیہ وسلم کے ساتھ انصار کی کچھ خواتین تھیں، آپ صلی اللہ علیہ وسلم نے انہیں نصیحت فرمائی اور (آخرت کی) یاد دہانی کرائی، اور فرمایا: ”تم میں سے جس عورت کے تین بچے فوت ہو جائیں وہ ضرور جنت میں داخل ہوگی۔“ تو ان میں سے ایک عورت کھڑی ہوئی، جو ان میں سب سے زیادہ باوقار تھی، اس نے عرض کیا: ”اے اللہ کے رسول! اور جس کے دو بچے فوت ہوئے ہوں؟“ آپ صلی اللہ علیہ وسلم نے فرمایا: ”جس کے دو فوت ہوئے ہوں (اس کے لیے بھی یہی بشارت ہے)۔“
امام طبرانی رحمہ اللہ فرماتے ہیں: ”ان دونوں حدیثوں کو عاصم سے صرف ہیثم بن جہم نے روایت کیا ہے، ان دونوں کی روایت میں عثمان بن ہیثم منفرد ہیں۔“ [المعجم الأوسط/باب الميم/حدیث: 6076]