ابو خلدہ رحمہ اللہ بیان کرتے ہیں کہ میں نے میمون کردی رحمہ اللہ کو سنا، وہ مالک بن دینار رحمہ اللہ کے پاس تھے، تو مالک بن دینار رحمہ اللہ نے ان سے کہا: ”شیخ کو کیا ہوا کہ اپنے والد سے حدیث بیان نہیں کرتے؟ آپ کے والد نے تو نبی صلی اللہ علیہ وسلم کا زمانہ پایا اور آپ صلی اللہ علیہ وسلم سے سنا ہے۔“ انہوں نے جواب دیا: ”میرے والد ہمیں نبی صلی اللہ علیہ وسلم سے حدیث بیان نہیں کرتے تھے، اس اندیشے سے کہ کہیں کوئی کمی بیشی نہ ہو جائے۔ وہ کہا کرتے تھے: میں نے رسول اللہ صلی اللہ علیہ وسلم کو فرماتے سنا: ’جس نے جان بوجھ کر مجھ پر جھوٹ باندھا وہ اپنا ٹھکانا جہنم میں بنا لے۔‘ البتہ میں تمہیں ان (اپنے والد) سے ایک ایسی حدیث سناتا ہوں جو میں نے انہیں ایک، دو اور تین بار سے بھی زیادہ مرتبہ بیان کرتے سنا، وہ فرماتے تھے: میں نے رسول اللہ صلی اللہ علیہ وسلم کو فرماتے سنا: ’جو شخص کسی عورت سے نکاح کرے اور نکاح کے دن ہی اس کی نیت یہ ہو کہ وہ اسے اس کا مہر نہیں دے گا، تو وہ قیامت کے دن اللہ عزوجل سے اس حال میں ملے گا کہ وہ زانی ہوگا۔ اور جو شخص قرض لے اور اس کی نیت اسے ادا کرنے کی نہ ہو، پھر وہ مر جائے اور ادا نہ کرے، تو وہ اللہ تبارک وتعالیٰ سے اس حال میں ملے گا کہ وہ چور ہوگا۔‘“
امام طبرانی رحمہ اللہ فرماتے ہیں: ”اس حدیث کو ابو خلدہ سے صرف ابو سعید مولیٰ بنی ہاشم نے روایت کیا ہے، اور ابو میمون کردی سے یہ صرف اسی سند کے ساتھ مروی ہے۔“ [المعجم الأوسط/باب الميم/حدیث: 6213]