سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مجھے اجازت دی گئی ہے کہ میں عرش اٹھانے والے فرشتوں میں سے ایک فرشتے کے متعلق بیان کروں؛ اس کے قدم سب سے نچلی زمین میں ہیں، اس کے سر کے اوپری حصے پر عرش ہے، اور اس کے کان کی لو سے کندھے تک کا درمیانی فاصلہ سات سو سال تک پرندے کی مسلسل اڑان جتنا ہے، وہ فرشتہ کہتا ہے: «سُبْحَانَكَ حَيْثُ كُنْتَ» ”پاک ہے تو جہاں بھی تو ہو!““
اس حدیث کو محمد بن منکدر رحمہ اللہ سے، انہوں نے سیدنا انس بن مالک رضی اللہ عنہ سے، صرف ان کے بیٹے منکدر نے روایت کیا ہے اور ان کی اولاد اس کی روایت میں منفرد ہے۔
نیز اسے ابراہیم بن طہمان رحمہ اللہ نے موسیٰ بن عقبہ رحمہ اللہ سے، انہوں نے محمد بن منکدر رحمہ اللہ سے اور انہوں نے سیدنا جابر رضی اللہ عنہما سے روایت کیا ہے۔ [المعجم الأوسط/باب الميم/حدیث: 6503]