سیدنا انس بن مالک انصاری رضی اللہ عنہ سے روایت ہے کہ انہوں نے فرمایا: ”میں رسول اللہ صلی اللہ علیہ وسلم کے ساتھ سفر کر رہا تھا کہ اسی دوران آپ صلی اللہ علیہ وسلم کی سواری ایک گھاٹی سے نیچے اتری، اور رسول اللہ صلی اللہ علیہ وسلم تنہا چل رہے تھے، پس جب راستہ ہموار ہوا تو آپ صلی اللہ علیہ وسلم مسکرائے اور تکبیر کہی، تو ہم نے بھی آپ صلی اللہ علیہ وسلم کی تکبیر کی وجہ سے تکبیر کہی، پھر آپ صلی اللہ علیہ وسلم کچھ دور چلے، پھر دوبارہ مسکرائے اور تکبیر کہی، تو ہم نے بھی آپ صلی اللہ علیہ وسلم کی تکبیر کی وجہ سے تکبیر کہی، پھر ہم آپ صلی اللہ علیہ وسلم کے پاس پہنچ گئے تو لوگوں نے عرض کیا: اے اللہ کے رسول! ہم نے آپ کی تکبیر سن کر تکبیر تو کہی لیکن ہمیں یہ معلوم نہیں ہوسکا کہ آپ کس بات پر مسکرائے تھے؟ آپ صلی اللہ علیہ وسلم نے فرمایا: ”جبرائیل علیہ السلام میری اونٹنی کی نکیل تھام کر اسے لے جا رہے تھے، پس جب راستہ ہموار ہوا تو انہوں نے میری طرف التفات کیا اور کہا: آپ کو خوشخبری ہو اور اپنی امت کو بھی یہ نوید سنا دیں کہ جس نے یہ کہا: «لَا إِلَهَ إِلَّا اللهُ وَحْدَهُ لَا شَرِيكَ لَهُ» ”اللہ کے سوا کوئی معبودِ برحق نہیں، وہ اکیلا ہے، اس کا کوئی شریک نہیں“، وہ جنت میں داخل ہو گیا اور اللہ نے اس پر آگ کو حرام کر دیا ہے؛ تو میں اسی وجہ سے مسکرایا اور میں نے تکبیر کہی، اور میں اپنی امت کے لیے اس بات پر بہت خوش ہوا۔““
امام طبرانی رحمہ اللہ فرماتے ہیں: ”اس حدیث کو زہری رحمہ اللہ سے صرف عقیل رحمہ اللہ نے، اور عقیل رحمہ اللہ سے صرف سلامہ بن روح رحمہ اللہ نے روایت کیا ہے، اور ابوالطاہر رحمہ اللہ اسے بیان کرنے میں منفرد ہیں۔“ [المعجم الأوسط/باب الميم/حدیث: 6522]