سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میرے صحابہ کو برا بھلا نہ کہو؛ اس ذات کی قسم جس کے ہاتھ میں میری جان ہے! اگر تم میں سے کوئی احد پہاڑ کے برابر بھی سونا خرچ کر دے، تب بھی وہ ان کے ایک مُد کے برابر نہیں پہنچ سکتا اور نہ اس کے آدھے تک۔“
امام طبرانی رحمہ اللہ فرماتے ہیں: ”اعمش سے، انہوں نے ابوصالح سے اور انہوں نے سیدنا ابوہریرہ رضی اللہ عنہ سے یہ حدیث صرف زید رحمہ اللہ نے روایت کی ہے، جبکہ امام شعبہ رحمہ اللہ اور اعمش کے دیگر تلامذہ نے اسے ابوصالح کے واسطے سے سیدنا ابوسعید رضی اللہ عنہ سے روایت کیا ہے۔“ [المعجم الأوسط/باب الألف/حدیث: 687]