خباب، مولیٰ زبیر رحمہ اللہ، سیدنا زبیر بن عوام رضی اللہ عنہ سے روایت کرتے ہیں کہ انہوں نے عرض کی: ”اے اللہ کے رسول صلی اللہ علیہ وسلم ! جب ہم آپ کے پاس سے اٹھ کر جاتے ہیں تو جاہلیت کی باتیں کرنے لگتے ہیں۔“ آپ صلی اللہ علیہ وسلم نے فرمایا: ”جب تم ایسی مجلسوں میں بیٹھو جن کے بارے میں تمہیں اپنے نفس پر (گناہ کا) اندیشہ ہو، تو وہاں سے اٹھتے وقت یہ کہہ لیا کرو: «سُبْحَانَكَ اللَّهُمَّ وَبِحَمْدِكَ، لَا إِلَهَ إِلَّا أَنْتَ، أَسْتَغْفِرُكَ وَأَتُوبُ إِلَيْكَ» ”اے اللہ! تو اپنی حمد کے ساتھ پاک ہے، تیرے سوا کوئی معبودِ برحق نہیں، میں تجھ سے بخشش طلب کرتا ہوں اور تیری ہی طرف توبہ کرتا ہوں“، تو اس مجلس میں تم سے جو (گناہ یا کوتاہی) ہوئی ہوگی، وہ اس کے ذریعے معاف کر دی جائے گی۔“
یہ حدیث سیدنا زبیر بن عوام رضی اللہ عنہ سے صرف اسی سند کے ساتھ مروی ہے، جس کی روایت میں محمد بن یحییٰ کلبی منفرد ہیں۔ [المعجم الأوسط/باب الميم/حدیث: 6916]