سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب میت کو اس کی قبر میں رکھ دیا جاتا ہے اور اس کے ساتھی اس سے پیٹھ پھیر کر رخصت ہوتے ہیں، اور وہ یقیناً ان کے جوتوں کی چاپ سن رہا ہوتا ہے، تو اس کے پاس دو فرشتے آتے ہیں اور اسے بٹھاتے ہیں۔ وہ دونوں اس سے دریافت کرتے ہیں: ”تم اس شخص (یعنی محمد صلی اللہ علیہ وسلم ) کے بارے میں کیا کہا کرتے تھے؟“ رہا مومن، تو وہ جواب دیتا ہے: ”میں گواہی دیتا ہوں کہ وہ اللہ کے بندے اور اس کے رسول ہیں۔“ پھر اس سے کہا جاتا ہے: ”جہنم میں اپنے اس ٹھکانے کو دیکھو، اللہ نے تمہیں اس کے بدلے جنت میں ٹھکانا عطا فرما دیا ہے۔“ پس وہ (مومن) ان دونوں ٹھکانوں کو ایک ساتھ دیکھتا ہے۔“ [المعجم الأوسط/باب الميم/حدیث: 7025]