رفاعہ بن شداد رحمہ اللہ بیان کرتے ہیں کہ میں مختار بن ابی عبید کے پاس گیا تو اس کے پاس دو تکیے رکھے ہوئے تھے، اس نے کہا: ”اے لونڈی! ایک تکیہ لے کر آؤ۔“ میں نے کہا: ”یہ تکیہ موجود تو ہے۔“ اس نے کہا: ”نہیں، اس (تکیے) سے ابھی ابھی جبرائیل علیہ السلام اٹھے ہیں اور اس (دوسرے) سے میکائیل علیہ السلام اٹھے ہیں۔“ (رفاعہ رحمہ اللہ کہتے ہیں:) پس اللہ کی قسم! مجھے اسے اپنی تلوار سے مارنے سے کسی چیز نے نہیں روکا سوائے اس حدیث کے جو سیدنا عمرو بن الحمق رضی اللہ عنہ نے مجھے بیان کی تھی، وہ فرماتے ہیں کہ رسول اللہ صلی اللہ علیہ وسلم نے فرمایا: ”جس نے کسی شخص کو اس کی جان کی امان دی اور پھر اسے قتل کر دیا، تو وہ آگ میں ہوگا، اگرچہ مقتول کافر ہی کیوں نہ ہو۔“
امام طبرانی رحمہ اللہ فرماتے ہیں: ”اس حدیث کو نصیر -جو میرے نزدیک نصیر بن ابی الاشعث ہیں- سے عیسیٰ بن یونس کے علاوہ کسی نے روایت نہیں کیا۔“ [المعجم الأوسط/باب الميم/حدیث: 7090]