سیدنا حسل رضی اللہ عنہ (جو بنو عامر بن لؤی میں سے ایک ہیں) سے روایت ہے کہ انہوں نے فرمایا: رسول اللہ صلی اللہ علیہ وسلم اپنے حج کے موقع پر ایک ایسے شخص کے پاس سے گزرے جو اپنا حج مکمل کر چکا تھا، جبکہ ہم بھی آپ صلی اللہ علیہ وسلم کے ہمراہ تھے۔ آپ صلی اللہ علیہ وسلم نے اس سے دریافت فرمایا: «أَسَلِمَ لَكَ حَجُّكَ؟» ”کیا تمہارا حج (سلامتی و قبولیت کے ساتھ) مکمل ہوا؟“ اس نے عرض کیا: جی ہاں، اے اللہ کے رسول! آپ صلی اللہ علیہ وسلم نے فرمایا: «ائْتَنِفِ الْعَمَلَ» ”(اب) نئے سرے سے اپنے عمل کا آغاز کرو۔“
امام طبرانی رحمہ اللہ فرماتے ہیں: ”یہ حدیث سیدنا حسل رضی اللہ عنہ سے صرف اسی سند کے ساتھ مروی ہے، اور محمد بن سلیمان بن مسمول اسے بیان کرنے میں منفرد ہیں۔“ [المعجم الأوسط/باب الميم/حدیث: 7504]