ام المومنین سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم نے کبھی کسی عورت کو نہیں مارا، نہ اپنے کسی خادم کو، اور نہ اپنے ہاتھ سے کبھی کسی چیز کو مارا، سوائے اس کے کہ آپ صلی اللہ علیہ وسلم اللہ کی راہ میں جہاد کر رہے ہوں۔ آپ صلی اللہ علیہ وسلم کو جب کبھی کوئی تکلیف پہنچائی گئی تو آپ صلی اللہ علیہ وسلم نے اس تکلیف دینے والے سے بدلہ نہیں لیا، ہاں اگر اللہ کی حرمتوں کو پامال کیا جاتا تو اللہ کی خاطر بدلہ لیتے۔ اور جب بھی آپ صلی اللہ علیہ وسلم کو دو کاموں کے درمیان اختیار دیا گیا تو آپ صلی اللہ علیہ وسلم نے ان میں سے آسان کو اختیار فرمایا، جب تک کہ وہ گناہ نہ ہوتا، اور اگر وہ گناہ ہوتا تو آپ صلی اللہ علیہ وسلم سب لوگوں سے بڑھ کر اس سے دور رہنے والے ہوتے۔“
امام طبرانی رحمہ اللہ فرماتے ہیں: ”اس حدیث کو داود طائی سے زافر بن سلیمان کے سوا کسی نے روایت نہیں کیا، عصمہ بن متوکل اسے بیان کرنے میں منفرد ہیں۔“ [المعجم الأوسط/باب الميم/حدیث: 7651]