سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے مسلمانوں سے مشورہ فرمایا کہ لوگوں کو نماز کے لیے جمع کرنے کا کیا طریقہ اختیار کیا جائے؟ لوگوں نے کہا: ”بوق (نرسنگا) پھونکا جائے۔“ آپ صلی اللہ علیہ وسلم نے یہودیوں کی مشابہت کی وجہ سے اسے ناپسند فرمایا۔ پھر انہوں نے ناقوس کا ذکر کیا تو نصاریٰ کی مشابہت کی وجہ سے اسے بھی ناپسند فرمایا۔ اسی رات انصار کے ایک صاحب، جن کا نام سیدنا عبداللہ بن زید رضی اللہ عنہ تھا، اور سیدنا عمر بن خطاب رضی اللہ عنہ کو خواب میں اذان دکھائی گئی۔ چنانچہ انصاری صحابی رات ہی کو رسول اللہ صلی اللہ علیہ وسلم کی خدمت میں حاضر ہوئے، تو اللہ کے نبی صلی اللہ علیہ وسلم نے سیدنا بلال رضی اللہ عنہ کو حکم دیا اور انہوں نے اسی کے مطابق اذان دی۔ سیدنا عمر رضی اللہ عنہ نے کہا: ”سنیے! میں نے بھی ویسا ہی خواب دیکھا تھا جیسا انہوں نے دیکھا، لیکن وہ مجھ سے سبقت لے گئے۔“
امام طبرانی رحمہ اللہ فرماتے ہیں: ”اس حدیث کو زہری سے عبدالرحمن بن اسحاق کے سوا کسی نے روایت نہیں کیا، اور عبدالرحمن سے خالد کے سوا کسی نے روایت نہیں کیا۔“ [المعجم الأوسط/باب الميم/حدیث: 7878]