سیدنا انس بن مالک رضی اللہ عنہ سے روایت ہے کہ سیدنا ابو طلحہ رضی اللہ عنہ نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم نے بھوک کی وجہ سے اپنے پیٹ پر پتھر باندھ رکھا ہے، تو انہوں نے فرمایا: ”اے ام سلیم! میں نے رسول اللہ صلی اللہ علیہ وسلم کو دیکھا ہے کہ آپ صلی اللہ علیہ وسلم نے شدتِ بھوک کی بنا پر اپنے شکم مبارک پر پتھر باندھا ہوا ہے، لہٰذا آپ صلی اللہ علیہ وسلم کے لیے کچھ کھانا تیار کرو۔“ چنانچہ انہوں نے قطاہ (پرندے) کے جسم کے برابر ایک چھوٹی سی ٹکیہ تیار کی۔ پھر انہوں نے نبی صلی اللہ علیہ وسلم کو دعوت دی، تو رسول اللہ صلی اللہ علیہ وسلم نے وہ ٹکیہ لے لی، پھر سیدہ ام سلیم رضی اللہ عنہا گھی کی ایک کپی لے کر آئیں اور اس میں سے کھجور کی گٹھلی کے برابر گھی نچوڑا اور اس ٹکیہ کو اس سے چوپڑ دیا، پھر آپ صلی اللہ علیہ وسلم نے اس میں برکت کی دعا فرمائی، پھر فرمایا: ”مسجد والوں کو بلا لاؤ۔“ چنانچہ انہوں نے انہیں بلایا تو اس ایک ٹکیہ میں سے ستر آدمیوں نے کھانا کھایا، پھر رسول اللہ صلی اللہ علیہ وسلم اور گھر کے افراد نے بھی کھایا، پھر آپ صلی اللہ علیہ وسلم نے اس میں سے اپنی ازواجِ مطہرات رضی اللہ عنہن کی طرف بھی بھجوایا، اور وہ کھانا اپنی اصل مقدار سے بھی زیادہ بچ گیا۔
اس حدیث کو یزید بن ابی منصور رحمہ اللہ سے صرف سہل بن اسلم رحمہ اللہ نے ہی روایت کیا ہے۔ [المعجم الأوسط/باب الألف/حدیث: 799]