قیس بن ابی حازم رحمہ اللہ بیان کرتے ہیں کہ میں سیدنا ابوبکر صدیق رضی اللہ عنہ کی خدمت میں حاضر تھا کہ ان کے پاس ایک شخص آیا اور عرض گزار ہوا: ”اے خلیفۂ رسول! یہ (میرا بیٹا) میرا سارا مال لے کر اسے ختم کر دینا چاہتا ہے“، سیدنا ابوبکر رضی اللہ عنہ نے اس (بیٹے) سے پوچھا: ”تم کیا کہتے ہو؟“ اس نے کہا: ”جی ہاں“، تو سیدنا ابوبکر رضی اللہ عنہ نے فرمایا: ”تمہارے لیے اس کے مال میں سے بس اتنا ہی ہے جتنا تمہاری ضرورت کے لیے کافی ہو“، اس نے عرض کیا: ”اے خلیفۂ رسول! کیا رسول اللہ صلی اللہ علیہ وسلم نے یہ نہیں فرمایا تھا: «أَنْتَ وَمَالُكَ لِأَبِيكَ» ”تم اور تمہارا مال تمہارے باپ کا ہے“؟“ تو سیدنا ابوبکر رضی اللہ عنہ نے فرمایا: ”تم اسی بات پر راضی رہو جس پر اللہ عزوجل راضی ہوا ہے۔“
اس حدیث کو اسماعیل بن ابی خالد رحمہ اللہ سے صرف منذر بن زیاد رحمہ اللہ نے روایت کیا ہے۔ [المعجم الأوسط/باب الألف/حدیث: 806]