سیدنا ابو موسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بے شک اللہ تعالیٰ بیمار کے لیے وہ بہترین عمل لکھتا ہے جو وہ تندرستی کی حالت میں کیا کرتا تھا، جب تک کہ وہ بیماری کی قید میں رہتا ہے، اور مسافر کے لیے وہ بہترین عمل لکھتا ہے جو وہ اقامت کی حالت میں کیا کرتا تھا۔“
امام طبرانی رحمہ اللہ فرماتے ہیں: ”اس حدیث کو مسعر سے، انہوں نے سعید بن ابی بردہ سے روایت کرنے میں رواد کے سوا کسی نے بیان نہیں کیا، اور محمد بن ابی السری اس کی روایت میں منفرد ہیں۔ اور اسے حفص بن غیاث نے مسعر سے، انہوں نے ابراہیم سکسکی سے، انہوں نے ابو بردہ سے، انہوں نے سیدنا ابو موسیٰ رضی اللہ عنہ سے روایت کیا ہے، اور حفص سے اسے احمد بن ابی الحواری کے سوا کسی نے روایت نہیں کیا۔“ [المعجم الأوسط/باب الميم/حدیث: 8609]