سیدنا ابو ہریرہ رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”میری امت کو بھی عنقریب وہی بیماری لاحق ہوگی جو پچھلی امتوں کو لاحق ہوئی تھی۔“ صحابہ کرام رضی اللہ عنہم نے عرض کیا: ”اے اللہ کے رسول! پچھلی امتوں کی بیماری کیا ہے؟“ آپ صلی اللہ علیہ وسلم نے فرمایا: ”اترانا، غرور و تکبر، ایک دوسرے سے پیٹھ پھیرنا، دنیا میں باہم مسابقت اور رشک، آپس میں بغض و عداوت اور بخل، یہاں تک کہ سرکشی و زیادتی عام ہو جائے گی، پھر قتل و خونریزی پھیل جائے گی۔“
امام طبرانی رحمہ اللہ فرماتے ہیں: ”اس حدیث کو ابو سعید غفاری سے صرف ابو ہانی نے روایت کیا ہے۔“ [المعجم الأوسط/باب الميم/حدیث: 9016]