سیدنا عبدالرحمن بن سمرہ رضی اللہ عنہ سے روایت ہے کہ جب رسول اللہ صلی اللہ علیہ وسلم نے جیشِ عسرت (غزوۂ تبوک کے لشکر) کی تیاری فرمائی تو سیدنا عثمان رضی اللہ عنہ اپنی آستین میں ایک ہزار دینار لے کر آئے اور انہیں رسول اللہ صلی اللہ علیہ وسلم کی گود میں انڈیل دیا۔ میں نے دیکھا کہ رسول اللہ صلی اللہ علیہ وسلم اپنا دستِ مبارک ان دیناروں میں ڈال کر انہیں الٹ پلٹ کر رہے تھے اور فرما رہے تھے: ”آج کے بعد عثمان بن عفان جو بھی عمل کریں، وہ انہیں نقصان نہیں پہنچائے گا۔“ آپ صلی اللہ علیہ وسلم نے یہ بات دو مرتبہ فرمائی۔
امام طبرانی رحمہ اللہ فرماتے ہیں: ”اس حدیث کو ابن شوذب سے ضمرہ کے سوا کسی نے روایت نہیں کیا، اور عبدالرحمن بن سمرہ رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/باب النون/حدیث: 9226]