سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بے شک سیدنا ابراہیم علیہ السلام نے صرف تین مرتبہ ایسی بات کہی جو بظاہر جھوٹ معلوم ہوتی تھی، جن میں سے دو اللہ کی خاطر تھیں: (ایک) ان کا یہ قول: ﴿إِنِّي سَقِيمٌ﴾ ”میں بیمار ہوں“، اور (دوسرا) ان کا یہ قول: ﴿بَلْ فَعَلَهُ كَبِيرُهُمْ هَذَا﴾ ”بلکہ یہ کام ان کے اس بڑے (بت) نے کیا ہے“۔ اور (تیسرا واقعہ یہ ہے کہ) وہ ایک ایسی سرزمین سے گزرے جہاں جابر بادشاہوں میں سے ایک جابر بادشاہ رہتا تھا اور ان کے ساتھ سیدہ سارہ رضی اللہ عنہا تھیں، تو اس بادشاہ نے ان کی طرف (کسی کو) بھیجا (کہ دریافت کرے): ”یہ عورت تمہاری کیا لگتی ہے؟“ انہوں نے فرمایا: ”یہ میری بہن ہے“، پھر اس نے ان کی طرف (حکم) بھیجا کہ: ”اسے میرے پاس بھیج دو“۔“ [المعجم الأوسط/باب الألف/حدیث: 956]