سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے (حجۃ الوداع کے موقع پر) خطبہ ارشاد فرمایا اور (دورانِ خطاب) فرمایا: ”اے لوگو! زمانہ گھوم کر اپنی اسی اصل حالت پر واپس آگیا ہے جیسا کہ وہ اس دن تھا جب اللہ تعالیٰ نے آسمانوں اور زمین کی تخلیق فرمائی تھی، اور یقیناً اللہ کے نزدیک مہینوں کی تعداد اللہ کی کتاب میں بارہ مہینے ہے ﴿إِنَّ عِدَّةَ الشُّهُورِ عِنْدَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ﴾ (سورۃ التوبہ: 36)، ان میں سے چار مہینے حرمت والے ہیں: (ایک) قبیلہ مضر کا رجب جو جمادی الاخریٰ اور شعبان کے درمیان ہے، اور ذوالقعدہ، ذوالحجہ اور محرم۔ اور (مہینوں کو آگے پیچھے کرنا یعنی) نسیء تو کفر میں مزید اضافہ ہے جس کے ذریعے کافروں کو گمراہی میں ڈالا جاتا ہے ﴿إِنَّمَا النَّسِيءُ زِيَادَةٌ فِي الْكُفْرِ ۖ يُضَلُّ بِهِ الَّذِينَ كَفَرُوا﴾ (سورۃ التوبہ: 37)، اور یہ اس وجہ سے تھا کہ وہ لوگ ایک سال صفر کو حلال کر لیتے اور دوسرے سال اسے حرام ٹھہرا دیتے تھے، اور اسی طرح وہ محرم کے ساتھ بھی کرتے تھے، اور یہ نسیء شیطان کی طرف سے تھا“۔ حدیث میں مزید یہ ہے کہ آپ صلی اللہ علیہ وسلم نے دریافت فرمایا: ”یہ کون سا دن ہے؟“ صحابہ نے عرض کیا: حرمت والا دن ہے۔ آپ صلی اللہ علیہ وسلم نے پوچھا: ”یہ کون سا مہینہ ہے؟“ انہوں نے عرض کیا: حرمت والا مہینہ ہے۔ آپ صلی اللہ علیہ وسلم نے پوچھا: ”یہ کون سا شہر ہے؟“ انہوں نے عرض کیا: حرمت والا شہر (مکہ) ہے۔ تب آپ صلی اللہ علیہ وسلم نے فرمایا: ”پس بلاشبہ اللہ تعالیٰ نے تم پر تمہارے خون، تمہارے مال اور تمہاری آبروئوں کو اسی طرح حرام قرار دیا ہے جیسے تمہارے اس شہر میں، تمہارے اس مہینے کے آج کے اس دن کی حرمت ہے؛ خبردار! میرے بعد کوئی نبی نہیں آئے گا اور تمہارے بعد کوئی (نئی) امت نہیں ہوگی، آگاہ رہو! جو یہاں موجود ہے وہ (میرا پیغام) اس تک پہنچا دے جو یہاں موجود نہیں ہے“۔ پھر آپ صلی اللہ علیہ وسلم نے اپنے مبارک ہاتھ بلند کیے اور تین بار عرض کیا: «اللَّهُمَّ اشْهَدِ، اللَّهُمَّ اشْهَدِ» ”اے اللہ! تو گواہ رہنا، اے اللہ! تو گواہ رہنا“۔
امام عبد بن حمید نے اسے ابوبکر بن ابی شیبہ کی سند سے طویل روایت کیا ہے، نیز امام ابو یعلیٰ نے بھی اسے موسیٰ بن عبیدہ کے واسطے سے ایک اور طریق سے بیان کیا ہے۔ [المطالب العالية بزوائد المسانيد الثمانية/كتاب الحج/حدیث: 1134]