میمون بن مہران رحمہ اللہ سے روایت ہے کہ میں نے جلیل القدر تابعی حضرت سعید بن مسیب رحمہ اللہ سے اس مطلقہ خاتون کے بارے میں دریافت کیا جسے تین طلاقیں دی گئی ہوں کہ وہ اپنی عدت کہاں گزارے گی؟ انہوں نے جواب دیا: ”وہ اپنے شوہر ہی کے گھر میں عدت گزارے گی“، میں نے ان سے عرض کیا کہ پھر حضرت فاطمہ بنت قیس رضی اللہ عنہا کی اس حدیث کا کیا بنے گا (جس میں ان کے دوسری جگہ عدت گزارنے کا ذکر ہے)؟ انہوں نے فرمایا: ”وہ ایسی خاتون تھیں جنہوں نے (اس معاملے میں) لوگوں کو الجھن میں ڈال دیا، وہ بہت تیز زبان تھیں“، یا یہ فرمایا کہ ”اپنی زبان کی درازی کی وجہ سے وہ اپنے سسرال والوں کے لیے تکلیف دہ تھیں“۔
امام عبد الرزاق نے ابن جریج کے واسطے سے میمون بن مہران سے روایت کیا ہے کہ انہوں نے حضرت سعید بن مسیب سے اس مسئلے میں علمی مذاکرہ کیا اور پہلی روایت کی مثل ہی ذکر کیا۔
میمون بن مہران رحمہ اللہ بیان کرتے ہیں کہ میں مدینہ منورہ آیا اور وہاں کے سب سے بڑے فقیہ کے بارے میں پوچھا تو مجھے حضرت سعید بن مسیب رحمہ اللہ کی طرف رہنمائی کی گئی، میں نے ان سے پوچھا کہ تین طلاق پانے والی عورت کہاں عدت گزارے؟ انہوں نے فرمایا: ”اپنے شوہر کے گھر میں“، میں نے عرض کیا کہ حضرت ضحاک بن قیس کی ہمشیرہ حضرت فاطمہ بنت قیس رضی اللہ عنہا کو جب ان کے شوہر نے تین طلاقیں دیں تو انہوں نے حضرت ابن ام مکتوم رضی اللہ عنہ کے گھر میں عدت گزاری تھی، اس پر سعید بن مسیب رحمہ اللہ نے فرمایا: ”وہ ایک دراز زبان عورت تھیں (اسی وجہ سے انہیں وہاں سے منتقل ہونے کی اجازت ملی تھی)“۔ [المطالب العالية بزوائد المسانيد الثمانية/كتاب الوليمة/حدیث: 1689]