حمید بن عبد الرحمن حمیری رحمہ اللہ بیان کرتے ہیں کہ سیدنا ابو موسیٰ اشعری رضی اللہ عنہ کو یہ خبر پہنچی کہ نبی کریم صلی اللہ علیہ وسلم کسی معاملے میں لوگوں سے ناراض ہوئے ہیں، چنانچہ وہ آپ صلی اللہ علیہ وسلم کی خدمت میں حاضر ہوئے اور اس کا تذکرہ کیا تو رسول اللہ صلی اللہ علیہ وسلم نے ارشاد فرمایا: ”تم میں سے کوئی شخص (غیر سنجیدگی سے) یوں کہہ دیتا ہے کہ میں نے نکاح کر لیا، میں نے طلاق دے دی، حالانکہ مسلمانوں کی عدت کا شرعی طریقہ کار یہ نہیں ہے، عورت کو اس کی عدت کے استقبال میں (یعنی ایسے طہر میں جس میں ہم بستری نہ کی ہو) طلاق دیا کرو۔“
امام طیالسی کی روایت میں سیدنا ابو بردہ رضی اللہ عنہ سے مروی ہے کہ ایک شخص بار بار یہ کہتا تھا کہ میں نے تمہیں طلاق دے دی، میں نے تم سے رجوع کر لیا، جب یہ بات نبی کریم صلی اللہ علیہ وسلم تک پہنچی تو آپ صلی اللہ علیہ وسلم نے سخت ناراضی کا اظہار کرتے ہوئے ارشاد فرمایا: ”ان لوگوں کو کیا ہو گیا ہے جو اللہ تعالیٰ کی مقرر کردہ حدود کے ساتھ کھیل تماشہ کرتے ہیں!“ [المطالب العالية بزوائد المسانيد الثمانية/كتاب الوليمة/حدیث: 1694]