سیدنا صفوان بن عسال رضی اللہ عنہ سے روایت ہے کہ ہم نبی کریم صلی اللہ علیہ وسلم کے ہمراہ ایک سفر میں تھے کہ ایک شخص سامنے سے آتا ہوا دکھائی دیا، جب رسول اللہ صلی اللہ علیہ وسلم کی نظر اس پر پڑی تو آپ صلی اللہ علیہ وسلم نے ارشاد فرمایا: ”یہ اپنے قبیلے کا کتنا ہی برا آدمی ہے“ یا فرمایا: ”کتنا ہی برا شخص ہے“۔ پھر جب وہ آپ صلی اللہ علیہ وسلم کے قریب پہنچا تو آپ صلی اللہ علیہ وسلم نے اسے اپنی مجلس میں قریب جگہ عطا فرمائی۔ جب وہ شخص وہاں سے اٹھ کر چلا گیا تو صحابہ کرام نے عرض کیا: اے اللہ کے رسول! جب آپ نے اسے دیکھا تھا تو آپ نے فرمایا تھا کہ ”یہ اپنے قبیلے کا کتنا ہی برا آدمی ہے“ یا ”کتنا ہی برا شخص ہے“، لیکن پھر آپ نے اسے اپنی مجلس میں اپنے قریب بٹھایا؟ تو رسول اللہ صلی اللہ علیہ وسلم نے ارشاد فرمایا: ”یقیناً وہ منافق ہے، میں اس کے نفاق کے پیشِ نظر اس کے ساتھ محض مدارات اور مصلحت کا برتاؤ کر رہا ہوں، اور مجھے یہ خوف تھا کہ وہ دوسروں کے ذہنوں کو میرے خلاف مسموم کر کے انہیں بگاڑ نہ دے“۔
اسے امام حارث نے اپنی مسند میں روایت کیا ہے، اس کی سند میں خلیل بن زکریا نامی راوی ضعیف ہے جس کی وجہ سے اس کی سند میں کلام موجود ہے۔ [المطالب العالية بزوائد المسانيد الثمانية/كتاب الأدب/حدیث: 2806]