ابو مجلز رحمہ اللہ سے روایت ہے کہ ایک شخص رسول اللہ صلی اللہ علیہ وسلم کی خدمت میں حاضر ہوا اور عرض کی: میں نے خواب میں دیکھا ہے کہ میرے سر کا اوپری حصہ کاٹ دیا گیا ہے اور میں خود اسے (اپنے کٹے ہوئے سر کو) دیکھ رہا ہوں۔ راوی بیان کرتے ہیں کہ یہ سن کر رسول اللہ صلی اللہ علیہ وسلم مسکرا دیے اور پھر دریافت فرمایا: ”جب تمہارا سر کاٹ دیا گیا تھا تو پھر تم اپنی کس آنکھ سے اسے دیکھ رہے تھے؟“ راوی کہتے ہیں کہ اس واقعے کے تھوڑی ہی مدت بعد رسول اللہ صلی اللہ علیہ وسلم کی وفات ہو گئی، چنانچہ اہل علم نے اس شخص کے سر کٹنے کی تعبیر نبی کریم صلی اللہ علیہ وسلم کی وفات سے کی اور اس کے دیکھنے کی تعبیر آپ صلی اللہ علیہ وسلم کی سنتوں کی اتباع و پیروی سے کی۔
یہاں کتاب "المطالب العالیہ بزوائد المسانید الثمانیہ" کا پہلا حصہ مکمل ہوا، جو ہمارے شیخ، امام، علامہ، شیخ الاسلام، حافظِ حدیث، قاضی القضاۃ شہاب الدین ابو الفضل احمد بن علی بن محمد بن حجر الکنانی العسقلانی المصری الشافعی رحمہ اللہ کی تالیف ہے، اللہ تعالیٰ ان کو اپنی رحمت کے سائے میں جگہ دے، «آمين» ۔ اس کی تحریر بروز ہفتہ، ماہ ربیع الثانی، سن 875 ہجری میں مکہ مکرمہ میں مکمل ہوئی، اور تمام تعریفیں اللہ ہی کے لیے ہیں، نیز اللہ تعالیٰ ہمارے سردار حضرت محمد صلی اللہ علیہ وسلم ، آپ کی آل اور صحابہ کرام پر رحمتیں اور سلامتی نازل فرمائے۔
«حَسْبُنَا اللهُ وَنِعْمَ الْوَكِيلُ» ”ہمیں اللہ ہی کافی ہے اور وہ بہترین کارساز ہے“۔ [المطالب العالية بزوائد المسانيد الثمانية/كتاب الأدب/حدیث: 2853]