سیدنا ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”کوئی زنا کرنے والا جب زنا کی بدکاری میں مبتلا ہوتا ہے تو وہ اس وقت (کامل) مومن نہیں ہوتا، اور نہ ہی کوئی چور جس وقت چوری کی واردات کرتا ہے تو وہ اس وقت (کامل) مومن ہوتا ہے، اور نہ ہی کوئی لٹیرا ایسی کسی گراں قدر اور بڑی چیز کی سرِ عام لوٹ مار کرتا ہے کہ لوگ (حیرت و حسرت سے) اس کی طرف اپنی نظریں اٹھا کر دیکھ رہے ہوں، تو وہ اس لوٹ مار کے وقت (کامل) مومن رہتا ہے۔“
یہ حدیث اپنی اصل کے اعتبار سے صحیح ہے اور اس کے شواہد صحیح بخاری (2475) اور صحیح مسلم (57) میں موجود ہیں، جس سے مراد یہ ہے کہ ان کبیرہ گناہوں کے ارتکاب کے وقت بندہ ایمان کے اعلیٰ درجے یا نورِ ایمان سے محروم ہو جاتا ہے، اگرچہ وہ دائرہ اسلام سے خارج نہیں ہوتا۔ [المطالب العالية بزوائد المسانيد الثمانية/كتاب الإيمان والتوحيد/حدیث: 2925]