سیدنا معاذ بن جبل رضی اللہ عنہ سے روایت ہے کہ انہوں نے فرمایا: ”کسی انسان نے اللہ تعالیٰ کے ذکر سے بڑھ کر کوئی ایسا عمل نہیں کیا جو اسے اللہ عزوجل کے عذاب سے زیادہ نجات دلانے والا ہو۔“ لوگوں نے دریافت کیا: ”کیا اللہ عزوجل کی راہ میں جہاد کرنا بھی (ذکر کے برابر) نہیں؟“ انہوں نے جواب دیا: ”نہیں۔ (جہاد بھی اس کی فضیلت کو نہیں پہنچ سکتا) اگرچہ وہ غازی (میدانِ جنگ میں) اپنی تلوار سے دشمن پر وار ہی کیوں نہ کر رہا ہو، کیونکہ اللہ سبحانہ و تعالیٰ نے خود فرمایا ہے: ﴿وَلَذِكْرُ اللَّهِ أَكْبَرُ﴾ [سورة العنكبوت: 45] ۔“
میں (ابن حجر) کہتا ہوں کہ امام احمد نے اس حدیث کا آخری ٹکڑا اس کے علاوہ ایک اور سند سے روایت کیا ہے جو کہ منقطع ہے، اور اس حدیث کی اصل امام ترمذی اور دیگر ائمہ کے ہاں موجود ہے۔ [المطالب العالية بزوائد المسانيد الثمانية/كتاب الأذكار والدعوات/حدیث: 3393]