کعب بن ذُہل ایادی رحمہ اللہ سے روایت ہے کہ وہ سیدنا ابودرداء رضی اللہ عنہ کی خدمت میں حاضر ہوا کرتے تھے، وہ بیان کرتے ہیں کہ میں نے انہیں اللہ کے نبی صلی اللہ علیہ وسلم سے یہ مروی حدیث بیان کرتے ہوئے سنا کہ آپ صلی اللہ علیہ وسلم نے فرمایا: ”میرے رب عزوجل کی طرف سے ایک پیغام لانے والا میرے پاس آیا اور اس نے یہ وحی پہنچائی: ﴿وَمَنْ يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللهَ يَجِدِ اللهَ غَفُورًا رَحِيمًا﴾ ”اور جو کوئی برا عمل کرے یا اپنی جان پر ظلم کرے، پھر اللہ سے بخشش طلب کرے تو وہ اللہ کو بہت بخشنے والا، نہایت رحم کرنے والا پائے گا۔“ [سورة النساء: 110] ۔“ دراصل اس سے پہلے نازل ہونے والی یہ آیت: ﴿مَنْ يَعْمَلْ سُوءًا يُجْزَ بِهِ﴾ ”جو بھی برا کام کرے گا اسے اس کا بدلہ دیا جائے گا۔“ [سورة النساء: 123] صحابہ کرام پر نہایت شاق اور گراں گزری تھی، اس لیے میں نے چاہا کہ اپنے صحابہ کو (اس نئی آیت کے ذریعے) خوشخبری سنا دوں۔ (سیدنا ابودرداء رضی اللہ عنہ کہتے ہیں کہ) میں نے عرض کیا: اے اللہ کے رسول! کیا اگرچہ اس نے زنا کیا ہو اور اگرچہ اس نے چوری کی ہو، پھر وہ اللہ سے مغفرت طلب کرے تو کیا اللہ اسے معاف کر دے گا؟ آپ صلی اللہ علیہ وسلم نے ارشاد فرمایا: ”ہاں۔“ میں نے دوبارہ عرض کیا تو رسول اللہ صلی اللہ علیہ وسلم نے فرمایا: ”ہاں، عویمر (ابودرداء) کی ناک خاک آلود ہونے کے باوجود (یعنی ابودرداء کے گمان کے برعکس اللہ اسے معاف فرما دے گا)۔“ کعب بن ذُہل رحمہ اللہ کہتے ہیں کہ میں نے سیدنا ابودرداء رضی اللہ عنہ کو دیکھا کہ وہ (اس بات کی تاکید کے لیے) اپنی انگلی سے اپنی ناک پر ضرب لگا رہے تھے۔
اس حدیث کی سند میں تمام بن نجیح راوی ضعیف ہے، البتہ اس میں مذکور مغفرت کا مضمون دیگر صحیح احادیث و قرآنی آیات سے ثابت ہے۔ [المطالب العالية بزوائد المسانيد الثمانية/كتاب التفسير/حدیث: 3579]